Ongezeko la visa vya Ebola mjini Beni, katika jimbo la Kivu Kaskazini, limesababisha vifo vya watu wengi kuripotiwa. Ndiyo maana, katika tangazo lililotolewa na Mchungaji kiongozi wa makanisa ya Beni, ametangaza kufungwa kwa milango ya kanisa la Wasabato la Madrandele, linalopatikana katika Kata ya Matonge, wilaya ya Mulekera mjini Beni.
Waumini wameitwa kusali katika makundi madogomadogo. Kiongozi huyu amesema kwamba miongoni mwa waathiriwa wa virusi vya Ebola, wameripotiwa Wasabato waliofariki. Lakini jambo la kusikitisha ni kwamba kuna Wakristo wanaoonekana kupuuza mambo hayo, wakidhani ni uongo pale inaposemwa kwamba Ebola ipo.
Nzuva Mulekya ndilo jina la mchungaji wa makanisa ya kituo cha Beni ville. Anasikitika kuona kwamba watu wamekatazwa kwenda kuhudhuria mazishi ya watu waliofariki kwa virusi hivyo, lakini baadhi yao wanapuuza wito huu bila hata kuheshimu kanuni za usafi ili kutokomeza ugonjwa huu.
« Kutokana na kutoheshimu kanuni za afya na waumini, baraza la kanisa lilikaa tarehe 30 Oktoba 2026 na kuamua kwamba waumini wafanye ibada katika makundi madogomadogo. Kuanzia Sabato ijayo, tarehe 7 Novemba, hakutakuwa na ibada katika kanisa la Madrandele, » amesema Mchungaji Nzuva Mulekya.
Kiongozi huyo alisisitiza, akiwaita viongozi wa makundi hayo kuandaa nafasi kwa watu, familia tatu au mbili pamoja na watoto, huku wakiheshimu kanuni za afya kama zilivyotangazwa na viongozi wa afya mjini humo.
Tukumbuke kwamba Gavana wa jimbo, Evariste Somo Kalule, alitangaza tarehe 19 Oktoba iliyopita kuwa siku ya kupambana na ugonjwa huo hatari. Kiongozi huyo wa serikali aliwaita wakazi kusitisha kazi zao kwa lengo hilo.
Joël Balume kutoka Goma.